وطن الجدود .. وطني لنغنى معا

[ام عبدالرحمن]

وطن الجدود.... وطنى
_____________
بالروح نفديك يا وطنى .. فأنا......انا سودانى انا
يحق لنا ان نفخر بك يا وطنى يامن كنت مرتع صبانا ،،وملعب شبابنا
يحق لك علينا يا وطنى ان نحملك فى حدقات العيون وتكون معنا ونكون معك فى هدوء وسكون
ونهتف للدنيا ونغنى انا سودانى.. يا بلد العز بلد الخيييييير... بلد الطيبة.
يا من نيلك هيلك .. جرى قدامك
نحبك و الله نحبك ..نحبك بتضحك ونحبك..عبوس
يامن حويت الخال و الخالة،، وفيك تربى العم والعمة
وفيك سطع نور شمسك.. وامى وابى وجدى وجدتى واخوانى واخواتى .. واحبابى.
سنغنى هنا باسمك كأضعف الايمان.
فمن احب ان يغنى اخوتى او ان يقدم لهذا الوطن حبه شعرا اؤ نثرا او تعليقا فمرحبا به دون
الدخول فى السياسة او الاطار الحزبى الضيق حب الوطن و لا شيء آخر غيره . كلنا ابناؤه وكل
ارجائه لنا وطن.
****
ياقمر دورين انا شفتك وين
طبعا فى الليل فى ضفاف النيل
فى رمال سهرانة راجياك تسيل
فى دموع الساقية يرنوا ليها نخيل
فى قلوب فرحانة عامرة بالتهليل
فى عيون نعسانة غارقة فى التكحيل
****
شمس الصباح والصباح رباح.. شمسك ياوطنى
طعم النجاح الزانو كفاح .. طعمك يا وطنى
حتى الجراح الزمانن راح .. مهرك يا وطنى
اهلى الفصاح اسياد الصلاح.. درعك يا وطنى
كل الملاح الجمالن فاح .. زينتك يا وطنى
انت عندى كبير و حبى ليك كتير
القوما ليك يا وطنى
****
شيدوه و زينوه وطن الجمال
علوه و خلوه فى عين الجمال
وأفدوه وأهدوه الروح والعيال
وأرعوه وأبنوه بعزم الرجال
بأملنا بعملنا بالمحنة بوفانا
الفى دمانا..نبنى جنة ونبتهج
نحن وصغارنا ونغنى..........
يا اصلنا ومبتدانا يا حلاة مسرح صبانا
وذكرياتنا ومشتهانا
انت فينا كبير وريدنا ليك كبير
القوما ليك يا وطنى

[لطفي عبدالمجيد فرح]

اختي تسلم كتير

[حمزة حسن محمد نور]

يا اصلنا ومبتدانا يا حلاة مسرح صبانا
وذكرياتنا ومشتهانا
انت فينا كبير وريدنا ليك كبير
القوما ليك يا وطنى


يا سلام على التعبير الرائع
دامت ايامكم بالامن والايمان
تسلمى وعيد الاستقلال والانفصال على الابواب
لكى من الشكر اجزله

[ام عبدالرحمن]

شكرا على حضورك اللطيف يا لطفى..
الاخ حمزة شكرا لحضورك الانيق واستمتاعك.
اخواتى نريد ان نجعل هذا البوست غنائية متفردة للوطن وكل من لديه ابيات لتمجيد الوطن او خاطرة
طيبة اومقالة تحكى عن تاريخه او بطولاته او ذكريات طيبة تمجده وتعليه دون اى خصومات سياسية
او جهوية او قبلية سواء من بنات افكاره او منقولة................... لنغنى جميعا لهذا الوطن الجميل.
الرجاء موجه الى السيد نائب المدير العام بان يجعل هذا البوست فى مكان بارز يمكن للجميع الاطلاع
عليه والمشاركة فيه لان الكثير لديه ما يقوله او يضيفه . وانا نفسى لدى الاستعداد للتواصل فى هذا
اذا وجدت التجاوب .فأنا مترعة بالكثير والكثير هو عندى كبير وحبى ليهو كتييييييييييييييييييييييير
وخاصة هذه ايام الوطن كما قلت اخى حمزة هو فى امس الحاجة لنا و لتكاتفنا لنؤازره و ليقوى بنا ،
ونقوى به سلمت يا وطن... من كل سوء.
دمتم ولكم شكرى

[حيدر شريف]

مشكورة على هذا البوست الرائع
ما ننحرم من تواجدكي وابداعكي
لكي ودي وتقديري

[حيدر شريف]

اليوم نرفع راية استغلالنا

اليوم نرفع راية استقلالنا ويسطر التاريخ مولد شعبنا
يا إخوتي.. غنوا لنا.. غنوا لنا..
يا نيلنا يا أرضنا الخضراء.. يا حقل السنا
يا مهد أجدادي ويا كنزي العزيز المقتنى
كرري تحدث عن رجال كالأسود الضارية
خاضوا اللهيب وشتتوا كتل الغزاة الباغية
والنهر يطفح بالضحايا بالدماء القانية
ما لان فرسان لنا بل فر جمع الطاغية
وليذكر التاريخ أبطالا لنا عبد اللطيف وصحبه
غرسوا النواة الطاهرة
ونفوسهم فاضت حماسا كالبحار الزاخرة
من أجلنا ارتادوا المنون ولمثل هذا اليوم كانوا يعملون
غنوا لهم يا إخوتي فلتحيا ذكرى الثائرين
إني أنا السودان أرض السؤدد
هذي يدى
ملأى بألوان الورود قطفتها من معبدي
من قلب إفريقيا التي داست حصون المعتدي
خطت بعزم شعوبها آفاق فجر أوحد
فأنا بها وأنا لها سأكون أول مفتدي

[محمد يحيى]

وطني مااجملك،،،خذ فؤادي خذ عيوني
‏ ،،،،،،،،،،
وطنا وكتبنا وباسمك رطنا
‏ @@@
مشكره علي الوطنيه اليقينيه يأختي
‏ دمتم ودامت ظهرن للوطن ..

[ام عبدالرحمن]

اعزائى احبتى ان القامة النوبية الشامخة التى نسجت و طرزت من سوداننا الحبيب
اجمل وطن ، حلة زاهية تفيض بهاءا و جمالا ، تقطر شهدا و حلاوة . لقد كتب احلى
القصائد و قام بتلحينها و وضع موسيقاها . لقد احببت ان تشاركونى واحدة من اروع
ماكتب ولحن وهى تمجد حواءا سواء كانت حواء تلك هى نحن او كانت حواء تلك هى
السودان . السودان الذى يمر باصعب المراحل عبر تاريخه الطويل . تسلم يا وطنى
الجميل،،،تسلم باذن الله.كما ان على صفحات منتدانا نقاش يتناول قضية الانفصال
وهذه القصيدة هدية لنا جميعا.عازه الشموخ عازة الاباءو الهمم.
عازة فى هواك
عازه فى هواك عازه نحن الجبال
وللنجوم صفاك عازه نحن النبال
عازه مابنوم الليل محال
وبحسب النجوم فوق الرمال
خلقه الزاد كمل، وانا حالى حال
متين اعود اشوف ظبياتنا الكحال
عازه ماسليت وطن الجمال
ولا ابتغيت غير الكمال
**
قلبى لسواك ماشفتو مال
خدينى باليمين وانا راقد شمال
عازه مانسيت جنة تلال
وملعب الشباب تحت الظلال
ونحن كالزهور فوق التلال
نتشابى للنجوم واناضافر الهلال
عازه جسمى صار زى الخلال
وحظى فى الركاب صابه الكلال
وقلبى لسع ما عرف الملال
اظنه ود قبيل كريم الخلال
عازه ما اشتهيت يوم الحجال
ولا السوار بكى فى يمينا جال
وعازه فى الفريق لى ضيق مجال
عازه فى هواك عازه نحن الجبال
وللنجوم من صفاك عازه نحن النبال
عزة مابنوم الليل محال
وبحسب النجوم فوق الرمال
خلقه الزاد كمل وانا حالى حال
متين اعود اشوف ظبيا تنا الكحال
عازه ماسليت وطن الجمال
ولا ابتغيت بدل، غير الكمال

قلبى لى سواك ماشفت مال
قبيلة بت قبيل ملا الكون رجال
عازه شفت كيف نهض العيال
جددوا القديم تركوا الخيال
روحك ام سمح سرى كالسيال
شجوا الفؤادحييوا محور الليال
عازه فى الفؤاد سحرك حلال
ونار هواك شفا وتيهك دلال
تزيدى كل يوم عظمة ازداد جلال

عازه فى حدا الخرطوم قبال
وعازه من جنان شمبات خيال
وعازه لربوع ام در جبال
وعازه فى الفؤاد دوا يشفى الوبال

مااروعك ايها القامة النوبية السمراء السامقة

[ام عبدالرحمن]

شكرا سعادة نائب المدير العام على تثبيت هذا الموضوع وتلبية نداء الوطن .
مشكورين الاخوان حيدر شريف و الاخ احمد يحي على مروركم واضافة قبلات
لهذا الوطن الحلو والابى لا تتوقفوا حتى ينضم الجميع الى الركب, هذه عازة
جاءتكم اكرموها

[ام عبدالرحمن]

عازة خليل.. الوطن .. جمال وابداع ما له مثيل .غناء للوطن الجميل.
افرد له الخليل مساحات ممتدة بمساحة الوطن من الحب والشموخ والعزة
والكبرياء فكانت عزة. صاغها ببراعة ، فاقت براعة صائغ الجواهر لجوهرته.
كلمات تموج بالعبير تعبق . عطرها يفوح فيندى جبين الوطن صندلا
و مسكا . عذبة .. كاحلام الطفولة تترى . كعروس يوم زفافها تتمخطر........
قوية كما صليل السيوف يوم الوغى تتفاخر.
لقد اجاد ذلك النوبى فى عازة قصيدة ومعنى ولحنا وروحا وموسيقي
اخذت بألباب السودانين فكانت شعارهم والهامهم, وبالافارقة فكانت غناؤهم ومتكاهم
واتخذها العالم خاصة شرق آسيا علما ومدرسة ، فادخلوها فى معاهدهم
وكلياتهم. عينى عليك بارده ايها الخليل ،كما اجدت وابدعت فى كل ماكتبت
وغنيت لعازة الوطن...
مال نسيم الليل بى برودك
نامت الازهار فوق خدودك
غرد العصفور فوق عودك
النفوس ما اتعدت حدودك
ما عرفنا عدوك من ودودك
بس انا المقسوم لى صدودك
يا حياتى و املى اللى راح
كانت عازة حاضرة فى معظم قصائده.
عازة قومى كفاك نومى ماكفانا دلال يومك

[ام عبدالرحمن]

لك الله ياوطنى هلت ايامك العظيمة بعظمة قامتك المديدة .. فانت القوى بتاريخك ، بي ناسك العزاز ، بى نيلك المرصع بالنجوم زى سيف مجوهر من غير نظام
على اجنحة الفجر ترفرف فوق اعلامك
ومن بين اكمامك تطلع شمس اعراسك
فى هذا اليوم الاغر رفعت راسك ياسمح يازين
يا سحنة نوبية
ياكلمة عربية
يا وشمة زنجية
فى هذا اليوم سجل التاريخ مولد شعبك..يابلدى ياحبوب..يا من عشقناك غنا
فلتغنوا لنا يا اخوتى .. اليوم نرفع راية استقلالنا....حبك وطن الجدود يجرى
فى دمانا
وطـني ..
وطن الجدود نفديك بالأرواح نجود
وطـني ..

وطن الجدود نحن الفداء
من المكائــد والعـداء
نتمنى ليك دايما تســـود
بدمانا نكتب ليك خــلود
هيا يا شباب هيا ياجنـود
هيا حطمــوا هذه القيود

وطن الجدود نِعم الوطن
خيراتو كم يتدفقـن
آن الآوان أن نـُُـمتحـــن
في سبيلو لا نطلب ثمن

هيا يا شباب هيا للأمام
سودانّا قد ملّ الملام
حرية كاملة هي المُرام
تؤخذ ولا يجدي الكلام
حذاري أن وطنك يضام
حذاري أن يصبح حطام
جهلٌ .. وفقرٌ .. وانقسام
فلنتحد ويجب نعيـد
لوطنّا أمجاد الكرام

هيا ياشباب ضموا الجنوب
القافلة سـارت لن تؤوب
أبنوا السلام دكوا الحروب
وماء نيلنا يكون عـــذوب

أهتف معي قل يا أخي
يحيا الكفاح وينبقي
فليخرج الباغي الشقي
ويرفرف العلم الأبّي

وطـنـي .. وطــني
وطن الجدود نفديك بالأرواح نجود
وطــــنــي ...

هيا يا وطنى.....

[ام عبدالرحمن]

وهذه رائعة اسماعيل حسن فى هذا الوطن الاشم واناسه الكرام
أنـــــــــا بلاد ناسا مواريثم أول شي ..كتاب الله
وحصان مسروج، وسيف مسنون حداه درع بـــــــــــلادي
كتاتيبم وكم نخلات تهبهب في جروف الساق
تسرج الليل مع الحيران
وشيخاً في الخلاوي ورع
وبقرة حلوبة تتضرّع وليها ضرع
بـــــــلادي أنـــــــــا ....تشيل الناس ، كل الناس وساع بي حيلاً وليلاً يسع
وتتدفق مياه النيل على الوديان
بياض الفضة في وهج الهجير بيشع
بلادي سهول .... بلادي حقول ....بلادي الجنة للعاشوها
ولى البرّة بيها سمع
بلادي... بلد ناســــــــاً تكرم الضيف
وحتى الطير يجيها جعان ومن أطراف تكيها شبع
بلادي بلد الصفقة والطنبور وجاراتن تنق بالليل
وبنوتن تحاكي الخيل
يشابن زي جدي الريل
بلادي أمان ، بلادي حنان وناسا حُنان
يكفكفوا دمعة المفجوع
ويبدّوا الغير على زاتم
يقسموا اللقمة بيناتم
ويدّوا الزاد حتن كان مصيرم جوع
يحبّوا الجار
يموتوا عشان حقوق الجار
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدار في نص الدار واتنبر
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي .. ديل قبيلتي لمّن أدور أفصل للبدور فصلي
ديل فصلــــي
أقول بعضي
ألاقيهم تسرّبوا في مسارب الروح
بقوا كُلـــي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معايا ، معايا زي ضليّ
أنا لو ما جيت من زي ديل كان وا ااأسافاي ، وا اامأساتي وااا زّلي
تصوّر كيف يكون الحال لو ما كنت سوداني
!وأهل الحارّة ما أهلي

[أشكاني]

يا الله يا أختاه ما أروعك وأنت تنثرين هذه الدرر هنا
لقد أثريت هذا البوست بكلمات صاغها عمالقة الشعر في بلادي ولحّنها قلب عاشق للوطن وأخرجها إحساس فنان مُتْرع بحب الوطن ، لذا كان وسيظل الوطن الأغنية التى يتغزل بها قلب كل وطني غيور عاش فوق ترابه و تحت سمائه
ما أجمل أن تكون اغنيتك هي ألوطن. ولازالت الاغنية الوطنية وخاصة القديمة منها هي سيدة الموقف حتى الان
بوركت ومشكورة على هذا العطاء



كلمة اخيرة
علمت بهذا البوست من خلال شكوى خال حامد والتبليغ عن وجود مشكله به
برجع ليك بكرة برواقة ونشوف أغاني الحماسة

[ابوجلال]

رائعة يا ام عبد الرحمن كروعة شعراء النوبة وعلى راسهم الاستاذ القامة خليل فرح رحمه الله تعالى

وهذه عازة في هواك اول قصيدة وطنية اصيلة كاصالة كاتبها
عازة في هواك عازة نحن الجبال ولليخوض صفاك عازة نحن النبال
عازة ماسليت وطن الجمال ولاابتغيت بديل غير الكمال
وقلبي لي سواك ماشفته مال خذيني باليمين انا راقد شمال
عازة ماسليت جنة بلال وملعب الشباب تحت الظلال
ونحن كالزهور فوق التلال تشابي للنجوم وانا ضافر الهلال
عازة في الفؤاد سحرك حلال ونار هواك شفا وتهيك دلال
عذابي في هواك حلو كالزلال تزيدي كل يوم عظمة وازداد جلال
عازة جسمي صار زي الخلال وحظي في هواك صابو الكلال
وقلبي لسعه ماعرف الملال لانه ود قبيل وكريم الخلال
عازة ماشكت مر الحجال ولا السوار بكي وفي يمنها جال
عازة في الفريق للطيق مجال قبيلة بت قبيل ملاء الكون رجال
عازة في ربوع ام در شمال عازة في حذا الخرطوم قبال
عازة من جنان شمبات حبال وعازة في الفؤاد دوي يشفي الوبال
خليل فرح

[خال حامد]

ياوطني بتـــأوه وبتحسر لفراقــك~~~~بتذكـرك زي أم وجنين في حشـاها
ذكــــــراي مـن صرختـي الأولــى~~~~وقت ضمة يمة والفرحة بمحيَّــاها
وقت ما بعرف شكــــــوَت وجعـي~~~~بصرخ للمسة حنانـها فمــا أوفـاها
بشوف شفقت قلُيـبـا في عينيـهــا~~~~فسبحـان الخلقـا والفطرا وسـوّاها
كل يـــوم بشـرع سفيـــنة الصبـر~~~~~وبَعِد ليوم صبــاي وأبحرلرضـاها
فــي تــلتي الأول لســن العشـــرا~~~~~ضــاع الأمل بين ذكراهــا وثـراها
فرحماهـا من الله العفــوّ الرحمـن~~~~فالجنـة مثواهـا والكـوثـر سقيــاها
جيتك يــاوطني أشكي ليـــك همي~~~~~الرسمَتـو الأقــدار بـأمــر مــولاها
مـن شرقــــك أنــا ود حـوريــتــو~~~~~~لآلي سـواكن من جيــدا ورثنــاها
شاركَتنا فرحة صبـانـــا وأحلامنـا~~~~~رافقتـنا بحنيـا لأيـــام مـا أحـــلاها
وقت الدغش بقيف بشبــاك بيتنـا~~~~~~بنتظر صـفرة شمســـها وضيـــاها
بدندن أهازيج طفل مليـــــان فرح~~~~~بيحكي أطماحــو وبنقشا في سماها
بيشيل خرتايتو بعد شربة الشــاي~~~~~بإطـلاقة بخور تيمـــان مــا أنـداها
بيــمش مدرستــو بزيـــو الأزرق~~~~~برفقة خِلو ودردشـة مـا أصفــــاها
وقت رجعتـو مع أقرانــــو وخلانو~~~~~قرقرة ضحك وحكـــــاوي وفكــاها
وقت العصـريـــة بيلعب الدافـوري~~~~~لعبـة الطفولـة والصبــا البيـهواها
يـوم الجمعـــة بينتـظر لمَّـــة الأهل~~~~~وجلسة خالاتـو كان دايماً بيتمناها
فــي العطـــلات بتكتـــر أفراحــــو~~~~~~في بحـرهـا وأرضهــــــا وفضـاها
بيبشر ليهــــــو البـحر بامـواجــو~~~~~~والأسمـــاك بتفرحبيـهو بلقيــــاها
وقت القمرا بطـل بهيبـة جمــــــالا~~~~~خيالو بسرح في عروسو وبهــاها
كبر وكبرت احـــــلامـو وآمـــــالو~~~~~~بينتظر يـــوم يفديــــك بـــعد الإها
شاف بلا د الفرنج ورغد معـــاشا~~~~~شاف فيها جمال الدُنـــا في ارجاها
وشافك يــا وطن بتتـــــألم لأرضك~~~~~الحفَّرا الرصـاص وبـالـــدم رواها
ركب براقــــو وبصهلـة فرحـتــــو~~~~~~روحو في جنوبــــك الموت هواها
شاف جنـــوبك زي طفلــة رضيعة~~~~~~تيّمتا الحروب بين ليــلا وضحـاها
وسط أصوات البنـــــــادق بتضحك~~~~~~وهمهمة الجند بتظن واحد دعـاها
شـاف رجـــالك في الوغى يـا وطن~~~~~نمـور في الكـون مـا في ســـواها
وقت الحمــا لبسوا شـارة السـرور~~~~لشـوفة الحور بشجاعــة ماألفنـاها
طـــال بيــــنا العـهد بوقف الحـرب~~~~~بسبب أحقـــــاد السلم ما هو مناها
ضحيــت عشـــانا كتيــر يـــا وطن~~~~~~بدماء روح شبـابـك ما أزكـــــــاها
وقت شاف الســلام بيتسـلق قممـو~~~~~للهفتو قــال منبع النيـل في عـلاهـا
شافــو بيبتســـم من شـرفة غربتو~~~~~بتيابواالبيض زي نجوم في دجــاها
ما فارقنـــاك والله ياالحبيـب جفـــا~~~~~من نجد بنرسليك أشواقنا وشــذاها
متيـن يكتمل بقربك هنانــا وأٌنسانا~~~~~ونبني أرضك من تــــرابا وميـــاها
بـــاب السـلام لكل أولادك يــاوطن~~~~كفانا ألم كل الهموم الســلام محــاها
كــل العـــالم بنتظر يــــوم عرسـك~~~~~بيشاهدو هلال حريرتـــــك وسنـاها
فالله .. الله ..يـــا سودانا قـم لجَدَّك~~~~~وأكرم أرضـك وقوة الله ترعـــــاها

[أشكاني]

ارض الخير افريقيا مكاني زمن النور والعزة زماني
فيها جدودي جباهم عالية مواكب ما بتتراجع تاني
اقيف قدامه واقول للدنيا انا سوداني
انا افريقي .. انا سوداني
انا بلدي بلد الخير والطيبة ارض وخزائن
فوقه جنائن نجوم وعيون للخير بتعاين
قمرو بضوي وما بغيب ابدا دائما باين
نورو بيهدي ليالي حبيبة
عليها اغني واقول انا افريقي انا سوداني
شمسي السطعت واشرق نورا وبقت شمسين
شمس العزة ونورا الاكبر
هلت شامخة زي تاريخي قوية وراسخة
ملت الدنيا وخيرنا بيكتر .. خيرنا بيكتر
شمس ايماني باوطاني دا الخلاني اقول للدنيا انا سوداني.

[أشكاني]

أغنية أنا سوداني (http://www.sm3na.com/song27772.html)

انا سوداني انا انا سوداني انا
انا سوداني انا انا سوداني انا
كل أجزائه لنا وطن إذ نباهي به ونفتتن
نتغنى بحسنه أبدا دونه لا يروقنا حسن
حيث كنا حدت بنا ذكر ملؤها الشوق كلنا شجن
نتملى جماله لنرى هل لترفيه عيشه ثمن
خير هذي الدماء نبذلها كالفدائي حين يمتحن
بسخاء بجرأة بقوى لا ينئ جهدها ولا تهن
تستهين الخطوب عن جلد تلك تنهال وهي تتزن
انا سوداني انا انا سوداني انا
ايها الناس ايها الناس
أيها الناس نحن من نفر عمروا الأرض حيث ما قطنوا
يذكر المجد كلما ذكروا وهو يعتز حين يقترن
حكموا العدل في الورى زمنا أترى هل يعود ذا الزمن
ردد الدهر حسن سيرتهم ما بها حطة ولا درن
نزحوا لا ليظلموا أحدا لا ولا لاضطهاد من امنوا
وكثيرون في صدورهم تتنزى الأحقاد والإحن
دوحة العرب أصلها كرم والى العرب تنسب الفطن
أيقظ الدهر بينهم فتنا ولكم أفنت الورى الفتن
انا سوداني انا انا سوداني انا
يا بلادي يا بلادي يا بلادي يا بلادي
يا بلادي يا بلادي يا بلادي يا بلادي

[خال حامد]

ما أروع هذه الأغنية الوطنية
ومن أجمل من الذي أضاف هذه الأغنية إلى هذا
البوست ليُشبعنا تناغماً وحنيناً أبدياً إلى وطننا السودان
لك الشكر عم أسعد

[أشكاني]

الاخت ام عبدالرحمن يؤسفني أن قمت بحجب المشاركتين الاخيرتين لانها كانت تعيق فتح البوست وحاولت جاهداً أن أقوم بتعديلها ولكني لم استطع لضيق الوقت وأوعدك باني سأحاول معالجة الامر وإعادة المشاركة مرة اخرى . ولكن أرجو منك في مُقبل مشاركاتك أن تحرصي على عدم أستعمال علامة النجمة (*) في السطر بشكل خط أو فاصل طويل لانها ستقوم بعملية تعليق للصفحة بأكملها

وأكرر إعتذاري مرة اخرى لحجب مشاركاتك الاخيرة

[ام عبدالرحمن]

آه وآه يا سوداننا ماهنت يوما علينا ..وغناءا عاطرا تشدو به الريح .. احبك من كل قلب يا بلادددددددى
فرحت نابعة من كل قلب ياااابلادددى..ندعوا الله ان يبعد عنك الاعادى و يعمى ابصارهم و يكيد للحساد
والعذال و يعلى شآنك ونغنى ..فوق فوق سودانا فوق.
.......
وطنا،،،، البى اسمك كتبنا و رطنا
احبك،، احبك مكانك صميم الفؤاد
و باسمك اغنى،، تغنى السواقى
خيوط الطواقى
سلام التلاقى ،، و دموع الفراق
و احبك ملاذ ،،،، و ناسك عزاز
و احبك حقيقة ،،، و احبك مجاز
واحبك بتضحك،، واحبك عبوس
بعزة جبالك ترك الشموس
وما بين ظلالك افتش واكوس
افتش طفولتى وملامح صباى
بناتك عيونن صفاهن سماى
وهيبة رجالك بتسند،،،،قفاى
احبك بتضحك واحبك عبوس
صحيح بتملأ عيني
وتشرف غناي،،،،
***
بحضرة جلالك ،،، يطيب الجلوس
مهذب امامك يكون الكلام،، لأنك
محنك عميق الدروس
مجيد المهابا ،،،،مديد القوام
شبابك نشابك،، شديد الزحام
أراهم وراهم غبار الحياة ،،
مدائن تعاين كأم العروس
تهلل تكلل جبين ،،،،،الامام
رزازا يبلل ،، اغانى الخليل
***
اصدق كلامك حقيقة و بخاف
اخاف الطريق الما بودى ليك
و اعاف الصديق ،،،،،،اللى
مايهتم بيك
معاك انتظارى ولو بالكفاف
وعنك بعيد ابيت،،،، الرحيل
وبيك اعتزاز الصباح الجميل
جميع الأغانى،، اتكالن عليك

[أشكاني]

انا امـدرمـان

كلمات الشاعر: عبدالمنعم عبد الحي

انا امدرمان تأمل في نجوعى
انا السودان تمثل في ربوعى
انا ابن الشمال سكنته قلبى
علي ابن الجنوب ضميت ضلوعى
انا امدرمان سلوا النيلين عنى
وعن عزمات فتاي عند التجنى
فخير بنيك ياسودان منى
سلو الحادي سلوا الشادي المغنى
انا امدرمان اذا ما قلت اعنى
فما نيل المطالب بالتمنى
تجيش النفس بالآمال لكن ولكن هذه لم لا تدعنى
انا امدرمان مضي امسي بنحسى
غدا وفتاى يحطم قيد حبسى
واهمس والفضاء يعلن همسى
واهتف والوري يعرف حسى
واخرج للملأ في ثوب عرسى
وابسم بعدما قد طال عبسى
فيا سودان اذ ما النفس هانت
اقدم للفداء روحي بنفسى.

[ام عبدالرحمن]

عزيزنا الاخ اشكانى شكر ا على لباقتك وادبك الرفيع وفنك البديع واسلوبك البليغ..
وخدمتك التى ليس لها مثيل..يا حامل القنديل .. وحادى الركب النبيل.
لك بعض ماقيل فى امدرمان:
خليل عازه ذكرها كثيرا. منها: من الفتيح للخور للمغالق
من علايل ابروف للمزالق
وهى من (ماهو عارف قدمه المفارق)والتى تتكلم عن جلاء الاستعمار.
وهنالك : انا ام درمان انا السودان
انا الدر البزين بلدى.. انا البرعاك سلام وامان
وانا البفداك ياولدى ...انا امدرمان
انا الطابية المقابلة النيل
وانا العافية البشد الحيل
انا الولدونى بالتهليل ..وهلت فوقى غابة رماح انا امدرمان
وسأوردها قريبا ان شاء الله

[ام عبدالرحمن]

الاخ ابو جلال والاخ خال حامد اثريتم البوست بتواجدكم واضافتكم الرائعة التى تنم عن فن راقى فى انتظار المزيد من الاضافات.
لكم شكرى ..دمتم واسركم بالف خير

[ابوجلال]

ومن اجمل كلمات الاغاني الوطنية ( الشرف الباذخ )
وقد تسمى بها اعياد استقلال هذا العام 2011
هذا النشيد الجميل للعملاق النوبي خليل فرح
يا ريت واحد ينزل لينا ( كود للاستماع هنا )
ولكم ودي

[خال حامد]

تلبية لرغبة سعادة المدير العام
الشرف الباذخ
http://www.4shared.com/audio/LeFD2Csj/__online.htm

[رسول]

قصيدة ( صــه يـا كنـــار )

نبذة عن الشاعر:
القصيدة للشاعر المبدع والجندى الباسل والوطنى الغيور المرحوم محمود أبوبكر حسن أحمد الملقب بالنسر. ولد عام 1918 بمدينة بور بالجنوب حيث يعمل والده ضابطا - من قبيلة الحلنقة- تزوج بوالدته هناك -من قبيلة التعايشة- حيث ترعرعت وسط قبيلة الدينكا وفى بيت السلطان نفسه! بعد أنّ فرّ والدها من بطش الإنجليز بعد معركة كررى فأواه سلطان الدينكا وفتح له قلبه وبيته فى إتحاد وطنى فريد ثم إنتقل من بور إلى مدينة عطبرة والتحق بمدرسة الأمريكان الأولية ثم مدينة الأبيض وإلتحق بالمدرسة الأميرية الوسطى ثم نقل مع والده إلى مدينة حلفا حيث أكمل المرحلة الوسطى وأخيراً إنتقل إلى أمدرمان عام 1932 وإلتحق بكلية غردون وبالكلية الحربية.

نفسية الشاعر:
هو ابن الجنوب بالميلاد، وابن الشرق والغرب بالنسب والثقافة، وابن الشمال والوسط بالتعليم. وهذه التداخلات الجغرافية والثقافية والعرقية جعلته غيورا على وطنه شديد الإعتزاز به وكان يمسك بحبل الوطن ولا يلتفت لعصبية القبيلة ولهذا جاءت قصائده وطنية خالصة تمجد الوطن وأهله بكل ألوان طيفهم.

مناسبة القصيدة:
عند إشتعال الحرب العالمية الثانية احتاجت بريطانيا لقوات إضافية فوعدت السودانين بالاستقلال إذا وقفوا بجانبها فى الحرب مقاتلين. وإنقسم السودانيون بين مكذب للوعد وبين مخاطر وإلى النوع الثانى كان ينتمى صاحبنا النسر!! فأسرع متحركا من عطبرة صوب الخرطوم للإنضمام للكتائب السودانية المقاتلة التي أرسلت لتنازل النازية من الأراضي الليبية وكان صديقه المحامى عقيل أحمد عقيل قد حاول إقناعه بعدم المشاركة إلا أنه لم يقتنع وكأنه يريد أن يبرئ نفسه أمام ربه ووطنه من التخاذل أو عدم إقتناص الفرص من أجل الوطن العزيز، فرد على صديقه ومن تبعه بهذه القصيدة الرائعة التي أصبحت شعاراً ونشيدا لمؤتمر الخريجين فيما بعد. وقام الموسيقار المرحوم إسماعيل عبد المعيّن بتلحين القصيدة فأبدع فى لحنها فزادها جمالا وجلالا وطيبا!!.

لغة القصيدة:
إنّ الشعر يقّيم بلغته وشاعرنا له القدرة على ابتكار معانى جديدة وأسلوب تعبير أكثر سهولة ورقة وثقافة لغوية عالية ومقدرة هائلة على تطويع الكلمات وتصوير المعانى التى تجيش بها نفسه. فالقصيدة تحتوى على كم من الكلمات التى لا يعرف معانيها كثير من متعلمى هذا الزمان. ويزيد الأمر تعقيدا أن خياله الخصب ساعده على الولوج فى الرمزية فجاءت بعض أبياته وإشاراته غامضة جدا. فالقصيدة تحتاج لسرب من النقاد أهل المعانى ممن ألمّ بالجوانب الفنية فى التعبير الشعرى وخاصة التعبير الرمزى ليفكوا طلاسمها ورموزها!! ولعل هذه الرمزية الكثيفة هى التى منعت النقاد من محاولة شرح القصيدة ولا ألومهم على ذلك. وقيل لأبى تمام: يا أبا تمام ، لم لا تقول من الشعر ما يعرف؟
فرد أبو تمام للسائل قائلا: وأنت لم لا تعرف من الشعر ما يقال؟




صه يا كنار و ضع يمينك في يــدي ودع الملامــة للملالة و ألــــدد
صه غير مأمور و هــات هواتنـــا ديما تهش علي أصيـد الأغيــــد
فاذا صغــرت فكن وضيئئا نيــــــرا مثل اليراعة في الظلام الأسود

واذا وجـــدت من الفكــاك بــوادرا..... فابذل حياتك غير مغلول اليـــــد
وخذ المطالب من زمانك و العــن ..... العريف علي الرعاف و لا تــــد
فاذا ادخـرت الي الصبـاح بسـالــة ..... فاعلم بأن اليوم أنسب من غـد
وأسبق رفاقـــك الي القيـود فـانني ..... اّمنت أن لا حــــر غير مقيـــــد
وأمـلأ فــؤادك بالرجــاء فإنــــــها ..... بلقيس جاء بها غياب الهدهــد
فاذا تبـــدد شمل قومك فاجمعــــن ..... فاذا أبوا فاضرب بعزمة مفرد
فــالبندقيــــة في بـــداد بيـــوتهــــا ..... طلعت بمجــــــد ليس بالمتبــدد

صه يا كنار و دع يمينك في يـــدي ..... فكأن يوم رضاك ليلة مولـــدي
أنا كم رعيتــــك و الأمـور عصيـة ..... وبذلت فيك جميع ما ملكت يدي
و جــري فؤادي نحـو قلبك سلسلا ..... لكن قلبـــك كالأصــــم الجلمـــد

لك في فـــؤادي يا كنـــار مكانــــة ..... أسمي و أقدس من مكانة أحمد
ولدي أحمــد كالحيـــاة و كالمــني ..... مــــن كل ممتنـــع و كل مؤيـــد
قاسمته ظــــل الحيــــاة و ظلمهــا ..... ونشـــأت بين جنانـــه المتجـــدد
صــه يا كنــار فما فؤادي في يـدي ..... طــورا أضــل و تــارة لا أهتدي

ولأنت أعلــم كيـف أقتنـص الهدي ..... حتي قنصــت به سهــاد الجدجـد
وأري العـوازل حين يملكنا الظمـأ ..... فأمــوت من ظمـأ أمـام المـورد
وأرود أرجـــاء البيــــان مداجيــــا ..... فـأضيـــق مـن أناتــه بالشــــرد
أنــا يا كنـــار مع الكواكب ســاهر ..... أسري بخفق وميضها المتعــدد
وعــرفت أخــلاق النجـوم فكـوكب ..... يهـب البيـان وكوكـب لا يهتدي
وكـــويكب جــم الحيـــاة وكوكــــب ..... يعصي الصباح بضوئه المتمرد

أن كنت تستهـدي النجــوم فتهتدي ..... فانشـد رضاي كما نشدت وجـدد
وإن كنــت لســت تطيق لومة لائم ..... فأنـــا الملوم علي عتاب الفرقـد
صه يا كنار فبعض صمتك مسعدي .... حتي شدوت فجاء شدوك مسعدي
وفضيلـــة بين التبســم و البكـــاء ..... لو تعلمـــــون، تجلــــد المتجلــد
وتـأمـــل مــــلأ التأمــل حسنــــــه ..... وكساه من حلل الأصيل العسجـد
ألـــم تأجــج في ثيابـــك لــم يكــن ..... ليـــزول دون اهابــــك المتوقـــد
غــربت بـه الأيـام و هي عوابس ..... فقضيتهــن مــودعا في الموعــد

صه يا كنار فبعض صمـك موجع ..... قلبي و موردي الردي و مخلـدي
أرأيت لولا أن شدوت لما ســرت ..... بي سارياتك و السري لم يحمــد
أنا لا أخــاف من المنون و ريبها ..... مـا دام عــزمي يا كنـار مهنــدي
سـأذود عن وطـني و أهـلك دونه ..... يومــاً يجئ فيــا ملائكة أشهــدي

[ابوجلال]

شكرا ليك يا خال حامد
هات القصيدة بادء طلبة معهد الموسيقى

[خال حامد]

شكرا ليك يا خال حامد
هات القصيدة بادء طلبة معهد الموسيقى
للأسف ما لقيتها وإذا لقيتها طوالي حأكبها ليك هنا

[ام عبدالرحمن]

هذه امدرمان تحكى عن حالها..وتفتخر بناسها و نداوة انفاسها..انظروا اليها من خلال هذه
اللوحة الوطنية الثرة للشاعر عبدالله محمد زين . بالله واصلوا هذه الغنائية المتفردة . و شكرا لك اخى رسول على
صه ياكنار . ارجوا ان تتحفنا بالمزيد.

أنا ام دُرمـــــان .. أنا الســـودان أنا الــدُره البزيــن بــــــلدي
أنا البرعـَـــاك ســـلام و أمــــان و أنـا البفــداك يــا ولــــــدي

أنـا أم درمـَــان لِسـَـــــــــان حــالـــك أريتــــك تدري بي حـَـــالـــــــــــي
أنـا الــقــــــدرت أحــــــــوالــــــــــــك و حبــــك بـــــدري او حالــــــــــي
أقـــــــوم بـــي أعــــظـــــــــم الأدوار و أكــــون الســــاحه للثــــــــــوار
وأبــقى البقـــــعه للأحـــــــــــــــــرار و أمثــــــل عــــزة الســـــــــــودان

أنـا أم درمــــان ســـليلة السـيــــــل قـسـمت الليـــل و بـنتَ صبـــــــــا
أنـا الولــــدوني بـالتــــهليــــــــــــل وهلـــت فــوقي غابــة رمــــــــــــاح
أنـا الطـابيـــة المقــــالبه النيـــــــل وأنـا العـافيــه البشـــد الحيـــــــــــل
وأنـا القبـــه البتـــضـوي الليــــــــل وتـهدي النـاس ســلام و أمـــــــــان

أنــا أم درمــان نصرت الديــــــــن و كنـت فـــــدايــــه للإســــــــــــــــلام
و روحـو حـولي ناس صادقــيــــن فنـــاهـــم في حيــــاتــي غـــــــــــرام
و زانــــوا المبــــــدأ و الفكــــــــره و خــــلـــدوا أعـــــظـــم الذكــــــــرى
و دخــــلو المـدرســة الكـــبــــــرى و نــالـــــوا شهـــــــــادة الإيمـــــــان

أنــا أم درمـــــان أنــا الأمــــــــه و صــــوت الأمـــــه و إحســـــاســــــــه
وأنـا التــأسيـــســـــه بـي تـــــــم و أنـــا اللــميـــــت شتــات ناســـــــــــــه
مزجـــــت شمالــــــه بجنــوبــــــه و سكــبت شــروقــــه في غــروبـــــــــه
و زرعت الطيبــه في دروبــــــه و طابــت عــــــــــــــزة للأوطــــــــــــــان

أنـا أم درمان سقــاني النيـــــــــل رحـــيـــق العــــزه مـــن كــاســــــــــــــه
أنـا اللي مجدو كنت دليـــــــــــــل وآيه و حـــــــــده لــي نـــــاســــــــــــــــو
أنـا الـفي الشاطئ الغــــربـــــــي و رأس غـــــردون مهــــــر حــربــــــــي
أنـا النيـــل الطلب قـــــــــــــــربي و مـــــــزج بــــــين كـافة الألــــــــــــوان

أنا ام درمـــان أنـا الواحــــــــــــــة ورى البســـــقي و العطشــــــــــــــــــان
بروقي تضـــوي لواحـــــــــــــــــــة و تهـــدي الســــــــاري و الضهبــــــان
و وردو و جــــرو فـــــوقــي الناس و نــــــادوا بقيـــــــــة الأجنــــــــــــاس
و للتـــعمير بقيـــت مقيــــاس و للتقـــــــديـر بقيـــــــــت مـــــــــيــــــــــزان

أنـــا أم درمــان مهيرة الميـــــــس أصــــيلة و مرســــــوني رجَــــــــــــال
قــلادتــي القُــــدرة و التقديـــــس و ارادتي تــســــــــابـــق الآجـــــــــــــال
أجــلـــب فـــوق ربــــــــــوع داري و نـفـســي تـــنــــافـــس أقــــــــــــداري
اريتــــــــم يعرفــو مســــــــداري و يخــلــو زمــــــامــي للفــرســــــــــــان

أنــا ام درمـــان دا ميـــــــــلادي و تيـــــلادي البشــــــــــيل اسمــــــــــــي
أنــــــا الـــــقــــدمــــــــت اولادي شــــــــرافــــه و سيـــــف على و سمــــى
و كـــــنت القـــــوه و الحـــولـــه و حــــــــــزت و فــــــــزت بالجـــــــــوله
و شلت الرايـــــــــه و الدولــــــه و فـــــي التـــــاريــخ بقـيــت عنــــــــوان

[ام عبدالرحمن]

فى عدد أكتوبر عام 1967 نشرت مجلة ( العربى ) الكويتية قصيدة بعنوان ( أمة الأمجاد ) للشاعر مصطفى عبد الرحمن فاختارتها الاذاعة المصرية لتغنيها فايزة أحمد بلحن محمد سلطان .. وفى السودان قرأوا المجلة فأعجبوا بالقصيدة وقرروا أن تكون نشيدا يبث عبر وسائل الإعلام السودانية المسموعة والمرئية وقام بتلحين القصيدة الثنائى السودانى محمد حميدة ويوسف السمانى وغنتها المجموعة وتصادف ان استمع للقصيدة جعفر النميرى الرئيس السودانى فأعجب بالقصيدة واتصل على الفور بالاذاعة السودانية وامر باذاعتها على الملايين من أبناء السودان وبعد يومين أصبحت قصيدة ( أمة الأمجاد ) على كل لسان ومن أبرز أناشيد السودان الوطنية .. وذات يوم كان الرئيس السودانى جعفر النميرى فى اجتماع مع طلائع الشباب وبدأ الشباب بأداء ( أمة الأمجاد ) فهب الرئيس السودانى واقفا وأدى مع الشباب ( أمة الأمجاد ) .. وفى هذا الصدد قال الكاتب السودانى السر أحمد قدور
إن نشيد أمة الأمجاد الذى صاغه شعرا عربيا سهلا الشاعر مصطفى عبد الرحمن وقدمه الثنائى الوطنى السودانى قد أصبح من الأناشيد ذات الارتباط القومى بالوثبات التى حققتها ثورة مايو المجيدة فى السودان
أمتى يا أمة الأمجاد والماضى العريق
يا نشيدا فى دمى يحيا ويجرى فى عروقى
أذن الفجر الذى شق الدياجى بالشروق
وطريق النصر قد لاح فسيرى فى الطريق
قبلة الأنظار يا أرض الهدى والحق كنت
ومنارا فى دجى الأيام للعالم عشت
أنت مهد النور .. مهد الفن والعرفان أنت
وستبقين ويبقى لك منا ما أردت
لا تبالى إن أساء الدهر يوما لا تبالى
قد صحونا لأمانينا .. صحونا لليالى
لك يا أرض البطولات ويا أم الرجال
ترخص الأرواح فى يوم الفدى يوم النضال
للغد المشرق يندى بالأمانى والعطور
أمتى .. سيرى إلى المجد و جدى فى المسير
حققى بالعمل البناء أحلام الدهور
و اصعدى بالعلم والأخلاق للنصر الكبير
اصعدى يا أرض أجدادى وأمى وأبى
اصعدى يا قلعة يحرسها كل أبى
اصعدى يا مشرق النور لأغلى مأرب
اصعدى للقمم الشماء فوق الشهب
أمتى يا أمة الأمجاد و الماضى العريق
يا نشيدا فى دمى يحيا ويجرى فى عروقى
أذن الفجر الذى شق الدياجى بشروق
وطريق النصر قد لاح فسيرى فى الطريق

[ام عبدالرحمن]

وهذه الشرف الباذخ على شرف اخينا ومديرنا ابوجلال المحترم عذرا اخى الهميم خال حامد نلبى طلب استاذنا نيابة عنك .. اتفقنا؟
نحن ونحن الشرف الباذخ
دابى الكر شباب النيل
قوم وقوم كفاك يانايم
شوف حداك حداك يا لايم
مجدك ولى و شرفك ضل
امتى تزيد زيادة النيل
نحن نطارد العنزة الفاردة
نحن نزود مشاريع النيل
نحن برانا نحمى حمانا
نحن نموت ويحيا النيل
ما بننندس ما بنتوصى
نحن نكيل برانا نشيل
نحن الطينة مطر العينة
نحن الوادى برقه يشيل
نحن الصولة سيوف الدولة
نحن كنانة اسماعيل
بابه العالى و شرفه الغالى
كان لجدودنا ظله ظليل
يا حكامنا جيبوا البينة
ولا انقرعوا كفوا الشينة
ده ود عمى وده ضريب دمى
انت شن طفيلى دخيل
يا نزلانا امرقو الذمة
كيف ينطاق هوان الامة؟؟
شالوا حقوقنا وزردوا حلوقنا
ديل عايزين دمانا تسيل
من تبينا قمنا ربينا
ما انفاسنا قط فى قليل
مافيش تانى مصرى سودانى
نحن الكل وادى النيل

[ابوجلال]

اشكرك من كل قلبي وقد قمت بحفظ القصيدة عندي
واصلي ابداعك

[أشكاني]

أولاً نأسف لعدم تمكني من الدخول للمنتدى في الايام السابقة وذلك لظروف العمل وقصر الوقت المتاح للدخول في النت عموماً
وبمجرد دخولي دلفت مباشرة لمنتدى الشعر وتحديداً الى هذا البوست ورأيت فيه ما دفعني الى لوحة المفاتيح (الكيبورد) نسبةً لما وجدت فيه من دُرر وقصائد تكاد تنفجر منها الوطنية .
ولا يسعني إلا ان اشكر عبدالرسول على ما أورده هنا من قصيدة (صه يا كنار) وهي بحق وحقيقة تحفة تتغلغل في الوجدان ، ولكم ان تتخيلوا ان كاتبها كان ضابطاً بالقوات المسلحة ويبدع مثل هذه الابداع ، يعني غير راي بالعساكر تماماً . وأجمل تسجيل لهذه الاغنية بصوت مجموعة من عمالقة الفن السوداني منهم اسماعيك عبدالمعين/ عبدالعزيز ابو داود/ احمد المصطفى/ عبدالقادر سالم / الشفيع/ صلاح مصطفى / سيد خليفة . كما أن اجمل ابيات هي

أنا لا أخاف من المنون و ريبها
ما دام عزمي يا كنار مهندي
سأذود عن وطني و أهلك دونه
في الهالكين فيا ملائكة أشهدي


يا الله عليك فعلا كلام ما بعده كلام

[أشكاني]

الاخت ام عبدالرحمن لم تتركي لمدينة ام درمان أغنية وإلا اتيتِ بِها
إنها ام درمان وكفى ولا شئ يُقال بعدها

انا ام درمان انا السودان
انا الدر البزين بلدى.. انا البرعاك سلام وامان
وانا البفداك ياولدى ...انا امدرمان
انا الطابية المقابلة النيل
وانا العافية البشد الحيل
انا الولدونى بالتهليل ..وهلت فوقى غابة رماح انا امدرمان
وسأوردها قريبا ان شاء الله


ولا تنسي وعدك اللي باللون الاخضر
نأمل في المزيد من هذه الروائع



وحتى لا نجحف في حق مدينة الخرطوم ولنا فيها ذكريات كما أن لها حق علينا نورد لها القصيدة التي تَغنى بها الفنان سيد خليفة

ياوطنى يا بلد أحبابى فى وجودى احبك وغيابى
يا الخرطوم يا العندى جمالك ..جنة رضوان
طوول عمرى ما شفت مثالك
فى اى مكان
انا هنا شبيت يا وطني
يا وطني يا بلد أحبابى فى وجودى احبك وغيابى
يا الخرطوم يا العندى جمالك ..جنة رضوان
طوول عمرى ما شفت مثالك
فى اى مكان
انا هنا شبيت يا وطني
زيك ما لقيت يا وطني
فى وجودى احبك وغيابى
ياحليلك وياحليل ايامك
على ليالى زمان
وقلبى عايش لغرامك ما بعد غرام
كانت أيام يا وطني
زى الأحلام يا وطني
بتذكر فيك عهد صبايا
على شاطئ النيل
حبيبى جالس حدايا
أسمر وجميل
انا بفخر بيك يا وطني
بالروح افديك يا وطني

[ام عبدالرحمن]

اخى المفضال اشكانى لقد سعدنا كثيرا بطلتك و نبض حروفك تتراقص طربا وفرحا بهذا الوطن الابي
فتثير فينا الشوق والحنين لبلدنا السامية فى علاها . لم انسى الخرطوم و لكنك السباق دوما . لذلك
سوف اوردة ما يمتع الجميع شعرا ومعنى. وذلك لما لمسته من حس وطني عالى لدى الجميع.
وهذه اغنية ( يا بلدى ياحبوب )
الفنان السودانى محمد وردي
الشاعر سيدأحمد الحردلو

عشانك بكاتل الريح
عشانك فؤادي جريح

عشانك أنا مقتول
وبموت معاك مقتول

عشانك يا حزن نبيل
عشانك يا حلم جميل
عشانك يا بلد
يا نيل
يا ليل
يا سمح يا زين

يا بلدي يا حبوب
أبو جلابية وتوب
سروال ومركوب
وجبة وسديري
وسيف سكين
يا سمح يا زين

يا وجه مليان غنا
مليان عشق وحنين
يا بنت يادوب
نهيداتا قايمين
شايلين تخا وفي رخا
شايلين بنات وبنين
يا سمح يا زين

يا آهة يا نمة
يا مدحة يا عمة
يا واحة في الصحراء
يا خصلة يا قمرة
يا بشارة يا بكرة
يا سمح يا زين

يا غابة قمحية
مشرورة فوق البلود
زي الصباحية
يا مزرعة باباي
غضبة الهبباي
يا نخلة مسقية
من ريق دبيشية
يا مقطعين دوباي
نازلين على الدنيا
أشواق وحنية
ياسمح يا زين

يا ليل ليل وليلية
يا نيل ونيلية
يا مرمي تحت الشمس
للقيلة ضلية
يا سحنة نوبية
يا كلمة عربية
يا وشمة زنجية

[خال حامد]

يا بلدي يا حبوب
يا سلام عليك أم عبدالرحمن على مواضيعك المتفردة بمعانيها الجميلة
أشكركِ بعنف

[رسول]

أولاً الشكر أجزله للأخت أم عبدالرحمن التي عزفت على أوتار الوطنية بهذا البوست فألهبت وأنهضت فينا مشاعر الوطنية الدافئة من خلال التعبير عنها بما سطرت عنها يراعات الشعراء وكما أشكر الأخ المرهف الحس / أشكاني على شكره لنقلي قصيدة صه ياكنار إلى البوست ضمن القصائد الجميلة التي ذكرت.

فعلاً يا أخي اشكاني فإن قصيدة صه يا كنار أعجبتني كما أعجبتكً لما فيها من تجرد تام ولغة عالية وتصوير بديع ونكران للذات تجاه الوطن والرمزية التي تعطيك مدى أبعد في التخيل وبناء الصور الجميلة والمعبرة.

[أشكاني]

الاخ عبدالرسول ما اجمل مرورك من هنا
وكل الشكر لتواجدك الراقي في هذا البوست الوطني
ولا تحرمنا من قلمك الشفيف وحسك الشاعري
واليك أغنية صه يا كنار بصوت
مجموعة من عمالقة الفن السودان
http://www.youtube.com/v/D_Xdz9uw_fM?fs=1&hl=en_US&rel=0&color1=0xcc2550&co lor2=0xe87a9f

ومتعك الله وكل المتواجدين هنا بوافر العافية وتمامها
وبلّغك كل مقصد نبيل تصبو اليه
كامل امتناني لكم جميعاً

[أشكاني]

الاخت ام عبدالرحمن
طولت الغيبة هذه المرّة عن هذا البيت
لا نرغب في أن نفتقد إحدى مهيرات المنتدى ونفتقد معها الحس الوطني الذي تمتلكه
نسأل الله أن ييسر لك امورك وتعودي لهذا البوست الذي أفتقدك ثلاثة ايام
اللهم احفظها اينما كانت


حنبنيهو
محجوب شريف

حنبنيهو البنحلم بيهو يوماتى
وطن شامخ وطن عاتى
وطن خيّر ديمقراطى
وطن مالك زمام أمرو
ومتوهج لهب جمرو
وطن غالى
نجومو تلالى فى العالى
إراده .. سياده .. حريّه
مكان الفرد تتقدم
قيادتنا الجماعيّه
مكان السجنِ مستشفى
مكان المنفى كليّه
مكان الأسري ورديّه مكان الحسره أغنيّه
مكان الطلقه عصفوره تحلق حول نافوره
تمازج شُفّع الروضه
حنبنيهو
البنحلم بيهو يوماتى
وطن للسلم أجنحتو ضدّ الحرب أسلحتو
عدد مافوق ما تحتو مدد للأرض محتله
سند للإيدو ملويّه
حنبنيهو..
البنحلم بيهو يوماتى
وطن حدّادى مدّادىما بنبنيهو فرّادى
ولا بالضجه فى الرادى ولا الخطب الحماسيّه
وطن بالفيهو نتساوى نحلم .. نقرا .. نتداوى
مساكن .. كهربا .. ومويه تحتنا الظلمه تتهاوى
نختّ الفجرِ طاقيّه
وتطلع شمس مقهوره
بخط الشعب ممهوره
تخلي الدنيا مبهوره
إراده
وحده شعبيّه

[ام عبدالرحمن]

القوما ليك ياوطنى..نفديك دائما وابدا ماحيينا
أفديك بالروح يا موطني
فأنت دمي كلما أقتني
بلادي أنا
تراث كرام ومجد العرب
وسفر كفاح روته الحقب
نسمت شذاها وطيب ثراها
وذوب هواها جرى في دمي
يعزز في السير من مقدمي
وأرضي هنا
بناء جدودي ومأوى أبي
وتاريخ شعب كريم أبي
فيا إخوتي
لنمضي إلى النور في ثورتي
نحطم قيد الليالي العتي

[ام عبدالرحمن]

القوما ليك يا وطنى..فلتدم ايها الوطن
النشيد الوطنى
نحن جند الله ,,وجند الوطن
إن دعـــــا داعي الفـــداء لم نخن
نتحـــــــدى المـــوت عنـــد المحن
نشترى المجــد بأغلى ثمـن
هـذه الأرض لـنا
فلـيعش ســــــوداننـــــــا
عـلماً بيـــــــن الأمـــــــم
يابني الســــودان هذا رمـــزكم
يحمل العبء ويحمى أرضكم

[ام عبدالرحمن]

في الفؤاد ترعاه العناية

بين ضلوعي الوطن العزيز
لي عداه بسوي النكاية
وان هزمت بلملم قواي
غير سلامتك ما لي غاية
إن شاء الله تسلم وطني العزيز
ليه ما ارعي الوطن الرعاني
والدهاه اشيله واعاني
الشباب والشيب شجعاني
قالوا نفدي الوطن العزيز
بقاسمه حظه سواده وبياضه
وايه مرادي انا غير مراده
ارعي نيله اشجع بلاده
يشيلوا حمل الوطن العزيز
عندي وطني بقضيلي حاجة
كيف اسيبه واروح لي خواجه
يغني وطني ويحيجني حاجة
لي عدوك ياوطني العزيز طبيعي اعشق صيده ورماله
وما ببيعه واقول مالي ماله
وما بكون آلة البي حباله
داير يكتف وطني العزيز
علمونا اهل الحضارة
كيف اضوق شان وطني المرارة
والمحن برضاي اصلي ناره
خوفي تحرق وطني العزيز
شفنا فيه جواب فيافي
والبطير وبسابق السوافي
ما مراده عفارم عوافي
بس يعظم وطني العزيز
نحن للقومية النبيلة
ما بندور عصبية القبيلة
تربي فينا ضغائن وبيلة
تزيد مصايب الوطن العزيز

[ام عبدالرحمن]

احب مكان
أحب مكان.. وطني السودان
أعز مكان.. عندى السودان
لأنو حسانه.. أعف حسان
طير و صوادح وروض جنان
الانسام بالطيب تغشاهو
والاقمار حفت بسماهو
والازهار تبسم فى رباهو
فيها رقة وفيها حنان
أحب مكان وطنى السودان
فيهو النيل .. النيل الخالد
فيهو الخال والعم والوالد
فيهو تراث من طارف وتالد
والخيرات اشكال والوان
أحب مكان عندى السودان
السودان اشراقة جديدة
في أفريقيا وبسمة سعيدة

[ام عبدالرحمن]

عشت ياسودانى
لي غرام وأماني
في سموك ومجدك
عشت يا سوداني
الجمال في رباك ما رأيتلو مثيل
والنضار في بهاك زي منابع النيل
والقمر في سماك عالي قدره جليل
يا شباب الجيل معقل الآمال
شوف وطننا نبيل حافل الأبطال
سامي قدره جليل بين شعوب النيل
يا سمير آسيني خفف الآلام
بي غناك أشجيني حقق الأحلام
بالفنون وريني روعة التلحين



هيا ابقوا عشرة على الوطن
ما بصح وطريقنا باين
يا شبابنا نقيف نعاين
الأمل معقود علينا
والعمل ظمئان إلينا
بي سواعدنا ونضالنا
في جنوبنا وفي شمالنا
غيرنا مين يحرث أرضنا
يبني ويعمر بلدنا
غيرنا مين يفني الأعادي

[ام عبدالرحمن]

وصية الأجداد
جدودنا زمان وصونا على الوطن
على التراب الغالي الما ليهو تمن
نحن حافظين للوصية
جوه في قلوبنا الوفية
ذكراهم بتلهمنا
وتشجينا بعزيمة قوية
ليك يا بلدنا عاد
صارفين روح ونية
صاينين للتراب
وحافظين للوصية
جدودنا زمان وصونا على الوطن
على التراب الغالي الما ليه تمن
بي سواعدنا القوية
حققنا استقلالنا ورفعنا علم الحرية
بيهوا الشعب احتفل
يوم جمع صفوفو
واتشمر للعمل
بي وحدة نضالو
كم حقق أمل
جدودنا زمان وصونا على الوطن
على التراب الغالي الما ليه تمن

[ام عبدالرحمن]

اخينا فى الله اشكانى الموقر وتحية طيبة
شكرا ليك مرتين ان حملت عبء المدونة وازلت الصفحات العالقة واخرى لاهتمامك ياهميم
بهذه الصفحات المتواضعة لتمجيد والغناء لهذا الوطن. نعم توقفت اياما ليدخل الاعضاء الى
هذه المدونة و يضعوا بصماتهم و خواطرهم ليمنحوا هذه الصفحات الحيوية والالق ، لينبض
روعة ، وينتشى فرحة ، و يزهو بابداعات ابنائه فيذدهر و يسمو . وهذا اقصى مانملكه لهذا
الوطن الغالى، وهذا اضعف الايمان. لايصح انا التى اكتب وانا التى اقرأ!
مرحبتين بلدنا حبابا..حباب النيل حباب الغابة
ياها ديارنا نحن اصحابا..نهوي عديلا ونرضي صعابا
**
بنعشق شمسها الحراقة
وتلهب في قلوب دفاقة
نحن شعارنا حب وصداقة
للناس الصفت اخلاقا
نحن بلدنا بخيراتا
البلد البتشبها ياتا
هي حياتنا واحنا حياتا
وما بندور بلاها وحاتا
**
نحن بلادنا نتحدابا
بخيرا الوفير وشبابا
لو ننهض جميع بصلابة
ما بتلقونا تاني غلابة
**
بسواعدنا راح نبنيها
وابدا ما بنفرط فيها
لو كان فتنا من واديها
لو قبلنا من واديها
من وين تاني تلقي الجيهة؟
**
في أخلاقنا في عاداتنا
إشراقات تميز ذاتنا
نحن حميدة سمحة صفاتنا
من أجدادنا ومن أبواتنا
**
لازم نبقي سمحين سيرة
وطنية وامانة وغيرة
نحن بلدنا لينا مصيرا
ومين عند غيرنا تلقي نصيرا؟
في تاريخا مافي مثيلا..بدرقا وسيوفا وخيلا
نتحزم بلدنا نشيلا..دون افكار علينا دخيلا
نخلص ونمشي بروح واعية..لوحدتنا دايما داعية
زي كل الشعوب الساعية..لسمعة بلادها مراعية
طريق الوحدة ياهو اللينا..حيبقي امانة في عينيننا
حجر الوحدة كم رسينا..ومن أفريقيا ولعند سينا
بظل الوحدة اتظلينا..ولكل العقد حلينا
متشابكات جميع ايدينا..وبنتمم جميع ما بدينا

[أشكاني]

أُحيِِ فيك هذه الروح الوطنية
هذا البوست بحق وحقيقة مؤثر كونه يتغنى للوطن
كما أن من حق الجميع التغني للوطن الذي خرجنا من رحمه
ولا يسعني إلا أن أضيف رائعة الفنان وردي

يقظة شعب

هَام ذاك النهر يستلهم حُسنا
وإذا عبر بلادي مَال تثـــــنى
طرب النيـــل لديها فتمـــــنى

فاروي يا تاريخ للأجــيال إنّا
ثائـــرُ إذ هـــبَّ من غفــــوته
ينشــــد العلياء في ثـــــورته
ما اندفاع الســـــيل في قوته
عجــــــباً ..
من له جند على النصر يعــين
كُلـــــنا نفساً ومــال وبنين ..

نحن في الشـــدة بأس يتجـلى
وعلى الود نضم الشمــل أهلا
ليس في شرعتنا عبدٌ ومولى
قســـــماً ..
سنرد اليوم كــــــيد الكائدين
وحدةً تقوى على مر السنين

[ام عبدالرحمن]

يا سلاااام عليك اخى اشكانى نعم
نحن فى الشدة بأس يتجلى ، ظهر ذلك جليا فى هذه الايام. اجراء الاستفتاء فى
اسلوب حضارى فريد وشجاعة متناهية وذلك دليل تفرد هذا الشعب الابي.
لقد ذكر مذيع العربية فى سياق احداث تونس
انها المرة الاولى عربيا ينتفض شعبا ليخلع
رئيسا لايريده . ولكنه نسى او تناسى او لايعلم
ان السودان فعلها مرتين. شعب عظيم سدد الله خطاه.
فاروي يا تاريخ للأجــيال إنّا
ثائـــرُ إذ هـــبَّ من غفــــوته
ينشــــد العلياء في ثـــــورته
ما اندفاع الســـــيل في قوته
عجــــــباً ...

[أشكاني]

وهذا اقصى مانملكه لهذا الوطن الغالى، وهذا اضعف الايمان. لايصح انا التى اكتب وانا التى اقرأ!
[/color][/color][/size][/i]


يكفينا إنك تتذوقين أغاني الوطن وتطربين لها كما يطرب لها إي وطني غيور على وطنه
يكفيك انك أوقدت شمعة للوطن بهذا المنتدى تتقد وتشتعل بالاذهان وتجبرنا على التعبير عن حبنا له في حدود الممكن والمتاح لنكسر بها رتابة حياة الاغتراب
دعونا نحلم ونغني لِمّا تبقى من الوطن (بعد إنفصال جنوبه) حتى لا يتشظى شماله
دعونا نُغني ونحكي عن شعب واحد متسامح مترابط في واقع معاش كما جسدته كل الاغاني الوطنية آنفة الذكر

رائعة احمد المصطفى

نحن في السودان نهوى اوطانا
لو رحلنا بعيد نطرى خلانا
نطرى جلْسَاتنا في ضفاف النيل
والسواقي تدور في سكون الليل
الوتر يشدو والطبيعة تشيل
النغم مفرح والحبيبة تميل
توحي الحانا
نطرى نجوانا وحبنا العزري
والوفاء معروف فينا من بدري
نلقى فوق ام دُر وربوع بحري
والعواطف دين والجمال فطري
تلك اوطانا
وحُبَاها الخالد يجري في دِمانا


سأغيب لمدة اسبوع إبتداءً من غدٍ وذلك لدواعي سفري للوطن
وأتمنى أن يحافظ هذا البوست على حماسه ونشاطه

[محمد عبدالله محمود]

[size="5"][center]لك الشكر والتقدير ام عبدالرحمن علي هذا الموضوع الرائع والجميل ونتمني من الجميع المشاركة في هذا البوست
ياوطـــني
يا وطنى يا بلد أحبابى
فى وجودى احبك وغيابى
يا الخرطوم يا العندى جمالك
جنة رضوان
طوول عمرى ما شفت مثالك
فى اى مكان
انا هنا شبيت يا وطنى
زيك ما لقيت يا وطنى
فى وجودى احبك وغيابى ..
ياحليلك وياحليل ايامك
على ليالى زمان
وقلبى عايش لى غرامك
ما بعد غراام
كانت ايام يا وطنى
زى الأحلام يا وطنى
بتذكر فيك عهد صبايا
على شاطئ النيل
حبيبى جالس حدايا
أسمر وجميل
انا بفخر بيك يا وطنى
بالروح افديك يا وطني

تخريمة :
تسافر وترجع بالسلامة ان شاء الله وربنا يتمم علي خير وما تنسي صور الزفاف منتظرينك

[ام عبدالرحمن]

شكرا اخى محمد على مرورك . وهذه المدونة من السودان والى السودان .ادخلوا و واصلوا
تشريفكم للوطن العزيز وارجو ان تحث الجميع للدخول فيه ليمتعنا بحبه للبلد . . . . و يسمعنا
حنينه و تلحينه و خواطره و الاذواق المتعددة تمنح المدونة الاثراء و الاستمرار.
ارفع صوتك ..هيبة و جبرة
خلى نشيدك عالى النبرة

[ام عبدالرحمن]

مشكور اخى المفضال وتمشى وتجى بالسلامة وان كان ستفتقدك الساحة
وانت الذى اثريت هذه المدونة بهمتك وحسك العالى . التحايا لك ولاهلك.

[ام عبدالرحمن]

بلداً هيلي نا..
دموعها.. دموعي نا..
أساها...أساي أنا..
ضميرها..ضميري نا..
كل آمالي نا..
السلام يملاها..يطلع من هنا..
و الحَمَام يتشابى

**
تقدل طفلة حلوة و بين إيديها كتابا..
و الحبوبة تمسح بالحنين أثوابا..
و القمرية تصدح..تستريح دبابة..
و القطر القبيل يمشي و يشق الغابة..
البالمبو يفتح للقلوب أبوابا..
و النُقارة زي أم كيكي و الربٌابة.
**
البلد الحنين ..سميتو يُمٌة و يابا...
بين العالمين ..عزة و جمال و مهابة..
الحزن القديم ...تمطر تزيلو سحابة..
لا أطفال حزانى...لا نازحين و غلابة.
**
في العصرية ..شٌفع جارية لألعابا..
و الشاي في المغارب ذكرياتو صبابة..
أشجار التبلدي العامرة بالترحابا...
وأشجار النخيل..و قُدرتا الخلابة.
**
ناس من كل لون ..إتعمٌرت أنسابا
و النيل في الهجير...دوٌزن وتر أعصابا..
سمحة الدنيا..بيك..و بين إيدينا حبابا..
يانا أهل بلدنا و قُدرَتم غلاٌٌبة

[ام عبدالرحمن]

ما عشقتك لي جمالك
___


ما عشقتك لي جمالك
إنت آيه من الجمال
أوهويتك لي خصالك
أنت أسمى الناس خصال
أو لي روحك لي جلالك
إنت هالة من الجلال
الفؤاد دايماً بنادي
في اغترابي وفي ابتعادي
ليك لأنك من بلادي

شلت من النيل صباهو
ومن جمال النيل بهاهو
من مناظر الثغر صفحة
من رهيد البردي لوحة
من نخيل الباوقة طرحة
ومن مريدي السمحة نفحة
الطبيعة حنت عليك
خلدت بصماتا فيك
ليك غرد كل شادي

ما بصح وطريقنا باين
يا شبابنا نقيف نعاين
الأمل معقود علينا
والعمل ظمئان إلينا
بي سواعدنا ونضالنا
في جنوبنا وفي شمالنا
غير من يحرث أرضنا
يبني ويعمر بلدنا
غيرنا مين يفني الأعادي

نحن سافرنا وبعدنا
ما عرفنا هواك بعدنا
كل ما لاقتنا فتنة
الفؤاد حن ولفتنا
وكل ما اتمناهو بسمة
من ملاك أضناه حبو
حلمو كان في الغربة نسمة
من أريج بلدو البحبو
جينا في لهفة مشاعر
ليك تزحمنا الخواطر
نبني مجدك يا بلادي

[ام عبدالرحمن]

ابناء النيل

من الجنوب قامت اغاني الريدة تتوجه شمال
حاضنة المداين والجناين والجبال
تزرع اغاني الوحدة فوق ضهر التلال
ليك ياشقيق الوادي يا ود عمي يا سمح الخصال
القبلي شال والنيل حضن رزقو الجديد رزق الحلال
رزق الازاهر والمزاهر والعيال
النيل قدل والقدلة عاد لابس وشاح اخضر حرير ومعاه شال
الوادي سال احيا الرجال الفاتو من سابق سنين
واقفين معاي زحمو المجال
وبيغنو التاريخ القديم وزمانو الطال
ما بينا ما بيدخل دخيل ودربنا ما داير سؤال
وحدنا اهدافنا الكبار اخوان على درب النضال
يلا يا تاريخ تعال انحنا الجنوب حضن الشمال
ونحن زي ما قال خليل يا عازة نحن في هواك نحن الجبال
يا عازة للعكر صفاك نحن النبال
نحن الزرع نحن الضرع نحن الفرع فوق في السما
وفوق الارض نحن الجبال

[ام عبدالرحمن]

ياخوانا جيناكم وكنا قايلين حننساكم وعسانا نلقاكم
وهذه المرة مع شاعر نوبى آخر امتطى صهوة
هذا الوطن العزيمة ابدع وصال وجال. وهو
الحردلو من جزيرة ناوا.
كنت قايلك
سيد احمد الحردلو
كنتَ قايلِك لىْ ضَهَرْ أركزْ عليهُ

وكنتَ قايلك لىْ صَدُر أهجعْ اليهُ

وكنتَ قايلكِ حُبْ كبيرْ ..

دقيتَ صدرى أباهى بيهُ

ورُحتَ أقدل فى البلدْ

وأدوبى ليكى .. أنِمّ ليهُ

وكنتَ قايلك لى زمنْ لِسَعْ…

وقايلِك جايه بيه

وفيه أطفالْ .. فيه أشعارْ

فيه خيرْ وسلامْ .. وفيه

وفيه سُودانا البنحلم بيه

والدايماً نكاتل نِحن ليه

-2-

كنتَ قايلْ ما فى بعدكِ

تانى زولاً أشتهيهُ

ولا جمالاً غير جمالِك

فى بلدنا نفيستى فيه

ولا وطنْ غيرك سَكَنْ

يدينى .. ما تدينى ليه

وجيتْ برايا إلى ضَراكِ

إتضارى من أحزانى بيه

مُحبْ مُطاردْ من بلاده

والعجيبه بلادهُ فيه

خافقه فى كُلْ نبضة ليه

وشايله أمطارْ فى عينيه

-3-

جيتَ قايلِك لىْ ضَرايه

ولىْ صَدُر يهجعْ معايا

وكنتَ شايلِك لىْ تميمه

وكنتَ كاتبِك لىْ محايه

ولما جات الحارة دايره

ودارتْ الأيامْ عليّا

لقيتكْ إنتِ غريبة عنى …

وواقفه فى جانبْ عِدايا

كأنه يومْ ما كنتِ ليّا

وكنتَ ليكى هدفْ وغايه

كنت قايلِكْ لى برايا …

وفى النهاية .. بقيتْ برايا !

[ام عبدالرحمن]

عودة باذن الله لبوست وطن الجدود وطنى الذى هجرناه وهو لايستحق الهجران.
نـحـن الـبـرق الـساطـع شعٌشع
ونـحـن السـيف الحـدو بيقٌـطـع
نحـن الدَرَقة السيف الـمـدٌفـع
مـانا القـاعـديـن مِتـل الشُفٌع
نحـن نـمـور البلـد الأشٌجـع
ونحـن النيل الدافـر جـعٌجـع
مـانا البـلـد النـايم وهجٌـع
نحـن نسـور سـودانـا الأروٌع
مانا ربايب الغرب الـرضٌـع
نحن النار الحارقة بِـتشٌلع
مانا العملا العيشن مُـدٌفـع
ومانا الخـوَنه السرقو الـشُفٌع
نحن بروق النجم الثاقب
فـوق لأرضنا شِهابو بِيـلٌمـع
ونحن الطلقة المـرقت فاتت
غير الدِروَة الفاتت ليها
قَـسَمـاً عَظَمـاً ماها بترٌجع
جِيب أسيادك وإنتْ " خليلهم"
ونحن الوطن الواقف مُـدٌفع
صفـاً واحد خلف رئيسنا
ولآمـن نمـرق ليهو قتالكم
مـانا الجبنا التانـى بنـرٌجـع
نحـن أسـود الوطن الأشٌجع
ونحـن الـروح السابقة
الطـلـقـة الطلعت مَرَقتْ مـن المُـدٌفـع
نحـن الـمـا بنـدور الـفـارغة
نحن دُخـانْ بارود المُـدٌفـع
زَمـنْ الـمـعـركـة تَبْ نتسٌكـع
مـاهـا خـنـاعـة نحـن الصاعقـة
ونحـن الـدوشكـا الصَوٌتْ وجـعٌجـع
ونحن مظلـة وبصَـواريخـنـا
والـدايرنـا قسماً بِـرٌجـع
يا سُـودانْ محـروسة بلادكْ
أرضاً بحراً جواً من ميلادكْ
ونحن الطلقة ودانة المُدٌفع
مانا ولاد ناس " دُقُـو المصنع "
نحن أولاد الـوطَنْ الواحـدْ
وكن نادانا المـوت فى تُـرابكْ
سابقة أرواحنا البرقْ البِشٌلع
نحن حمامـة ليهـو ســلامـكْ
وفى يوم حــربكْ
نحن فى صَفٌـكْ دانـة ومُـدٌفـع
ونحن أسـود مـن صُـنع عرينـكْ
ونحـن " وداعـة " الكـان ميلادنـا
ونـحـن دفاعـك .. ومـانـا بِـنرٌجـع